تیری اے نہ میری بیبا
دنیا گھمن گھیری بیبا
جدھر ویکھو نفسا نفسی
ہر تھاں میری میری بیبا
اتوں اتوں مومن بندے
من وچ ہیرا پھیری بیبا
دل دی نگری میلی کیتی
مسند رب دی جیہڑی بیبا
ظالم دا توں ہتھ نہ روکیں
دیویں ہلہ شیری بیبا
کس گل دی اے آکڑ تینوں
آخر مٹھی ڈھیری بیبا
حق دا چانن لے کے جاویں
گور اے گھپ اندھیری بیبا
اپنی مرضی چھڈ کے پائی
پیراں دے وچ بیڑی بیبا
جنت بدلے مومن وکیا
اپنی مرضی کیہڑی بیبا
مرضی سوہنے رب دی چلدی
تیری اے نہ میری بیبا
نکھڑ جاوے جس دا ماہی
اس دی عید اے کیہڑی بیبا
ہن تے آجا رب دے ولے
لا نہ بہتی دیری بیبا
جنید حسَن
اضافات:
نفس اے تیری مت ای ماری
کردا میری میری بیبا
اپنی مرضی چھڈ کے پائی
رب دے ناں دی بیڑی بیبا